الى ادريس…
(ما غ نتكلمش هنا على ادريس الزاوي مع الرابطه المغربيه للزجل ، أَوْ مع اتحاد الزجالين المغاربه ، أَوْ مع ربيع تيفلت للتنمية. غ نتكلم على (آخر) حدث عاشُه الزجال وقسم معنا فيه نشوة فرحُه وانتصار قصيدته للإبداع)
***
على مراية جوج احداث جداد تشكلت أحاسيس هذ الكلمه القصيره ف حق الصديق ادريس الزاوي اللي جمعني به الزجل لعمر تجاوز ربع قرن :
يا ادريس ǃ
نجيك من حِكمَه وشمها أرسطو ف كف الضو، اللي تاتقول أن ” الرجل المثالي تايشعر بالمتعَه ف تقديم المعروف للخرين”؟ أوْ نجيك م الحديث اللي تايقول ” خير الناس انفعهم للناس”؟ أَوْ نجيك من الشاعر الدانماركي هانز كريستيان أندرسن اللي قال “الاعتراف هو ذاكرة القلب” ؟
علاش ما نجيك من مثلنا المغربي اللي تايقول ” خديم الناس سيدهم”، وهكذا يسهال عليَّ ندخل لكلمتي من بابها الواسع.
أنت المغيب ف مهرجانات الزجل والحاضر ف مهرجانات ذاكرة تيفلت ؛ تيفلت اللي اعطيتها قصيده وقلت قليل ف حقها .. ذك اللي خصص لها صديقنا الزجال حميدا البلبالي كتاب، جمع فيه كرماء المبدعين من داخل المدينه ومن خارجها…
أنت المبعَّد من تكريم الجهات الرسميَّه ، ولمقرَّب من تكريم القلوب ، والقلب الكبير هو تيفلت . تبقى حاضر ف ثلاثه دالأزمنَه : حاضر ف حاضر الماضي ، وف حاضر الحاضر وف حاضر المستقبل (التعبير للقديس الأمازيغي أوغستان )
مرايتك غ تقراها الذاكره الاستشرافيّه واحد النهار قريب تطلع شمسُه على وذنين قلوبنا :
بدهنية الشغف دخلتِ واحد لعمر من عمر تيفلت للحياة الإبداعيّه وبقلب مُحب وشغوف شمرتِ على ذراعك تخدم الزجل ، و”الشغف تايزدهر لما تايعمل الواحد ذاك الشي اللي تايحب” ، تايقول واحد المفكر. هذ الحب هو اللي مخليك باقي واقف تعانق غاية الحياة العظمى المتجليه ف القيم الكبرى : خدمة الزجل والزجالين.
ذاكرة تيفلت ما ورثِهاش ، انت من صنّاعها لجانب ذوك العقول المتنورَه اللي سبق قلت عليهم ف مناسبات عديدَه “نجبوا مدينة تيفلت” أو اللي نجبَتهم هي .
شحال قدني نعد منهم ǃǃǃ
تيفلت تاتعرفك وغ تبقى تعرفك ولو تنساك أجندة ليام وتتخطاك اقدام الزمن.
أنت “عظيمات السعد” اللي قسمتِ معنا نبضات قلبك وضو مراية روحك ؛ لأنك عملتِ بمقوله الفيلسوف أوغست كونت اللي تاتقول “باش تحتفظ لك بالسعاده تقاسمها مع لخرين”.
انت الحامل لعهد شركنا ذاكرتُه ؛ ذاكرَه مغذيه بأغلى معاني الصدق وبأجمل معاني الوفاء ، قسمتِ معنا الكثير. وثقافة الاعتراف كتحطنا اليوم وديما قدام الذاكره الاستشرافيَّه حتى نكونوا لها منصفين ، بلا ما نتجملوا عليك ، حيث الانصاف من شيم الكرماء ، لأنه سِمَه على جبين التاريخ ، ولأنه ومن أكثر القيم الأخلاقيه نُبلاً ف ديوان زجلنا المشترك ؛ هو نتذكروا ع الأقل تاريخنا ومسارنا الفني اللي انت جزء منهم ؛ بل اللي انت واحد من صناعهم المخلصين ومن خدامهم الأوفياء.
نتذكروا اللي خدمونا وخدموا الفن اللي تاننتميوا له بالجسد والروح ، واللي اعطانا القصيده اللي جامعانا ع لحلو والمر. القصيده لمكبرانا على قيم رفيعَه ، العاطيانا أمثال الزاوي اللي بنُكران الذات قدم خدمات هامَّه ومتواصله للزجل وهو واقف على رجليه بجوج تايخدم الزجالين.
يا ادريسǃ ــ بلا مجامله ــ كنت المثل الأعلى للإيثار ، يقراوا لخرين وانت لجانب أصدقاءك / اصدقاءنا الكبار والشهام والأصفياء بارك إلى نظمتوا وسمعتوا لهم ، وبارك الى فرحتوا بهم وباركتوا لهم.
سعداتكم ǃǃǃ
اختياركم هذا ، وشم سؤال كبير على مرايتنا احنا الزجالين :
ــ شكون فينا فكر يعطي من عمرُه نهار واحد ، أوْ سويعات من وقتُه ، يسمع لنبضات قلب ادريس الزاوي؟ أوْ يكتب صفحَه أوْ سطر ف كتاب مرايتُه للأجيال الجايه ؟
وآ السميهǃ
خليني نخرَّجها من اعماقي : حقك تاخذُه لك قصيدتك.
هكذا تاتهمس لي مراية روح الزجل. هي وحدها القادرَه تعطيك حقك وكامل، كيف اعطتُه لك ف جامعة شعيب الدكالي وهي تاتحتفي بك ف 2018 احتفال أكاديمي بحضور الدكتورتين لطيفة الأزرق ونعيمة الواجدي مع ثلة م الباحثين ، وكما احتفت بك جامعة ابن طفيل ف مارس من عام 2021 احتفال أكثر من أكاديمي، واللي كان فيه لجانبك صديقنا عبد الرحيم باطما. هذ الحفل اللي غابوا فيه الزجالين وحضروا فيه نقاد وأساتذه باحثين وطلبَه .
حضروا النقاد والأساتذه . نذكر منهم ما جاني ف الذاكره وذا نسيت شي واحد يعذرني : د. الخطابي ، د. أحمد زنيبر، د. خالد مساوي، د. عز الدين معتصم، دة. فدوى بن خيرة، د. عصام لامحرك، ذ . محمد الشيكي، ذ. حسن خرماز، الأمريكيه الباحثه ف الزجل كاترين كارتيي، عزيز غالي، حمزة بولحديد، وطبعا د. عبد العزيز أعمار، ودة . حنان بن دحمان اللي عودونا على بحال هذ المناسبه واللي تاتجي سنويا بمناسبة اليوم العالمي للشعر.
حضر النقد الممنهج ف اسم كل من عبد الله آيت بولمان وعبد الإله الرابحي اللي قال كلمَه راقيه ف حق تيفلت وأهلها. ما ننساوش الترجمة للفرنسيَّه لوحدَه من قصايدك الجميله اللي قدمها صديقنا ادريس البشاري بصوته والمداخله القيمَه اللي قدمها الأستاذ الخطابي بالفرنسيَّه، اللي اعطاوا قيمَه مضافه للاحتفال .
واش ندوز بلا ما نوقف عند المداخلات اللي زادوا رفعوا مستوى اللقاء واللي جاوا من طرف أستاذه وطلبه باحثين …. ؟
كان نهار ، واش من نهار ǃ
ذاك النهار ، ضوُّه عمرُه ما يتـنسى. ذاك النهار ما قدَّتُه فرحَه بك ǃ
يا ادريسǃ
نخليوها هنا ، باش ما ننساوش أنه باقى قدامنا بزاف ما يتعمل وما يتعطى ، ولأن تيفلت باقيه تاتسالنا بزاف وبزاف ؛ وهذ “بزاف” محتاجَه للمزيد من إرادتنا وعزيمتنا وشغفنا كما احنا محتاجين للمزيد من الطاقه الشعريَّه البديله والمتجددَه حتى نتمكنوا نغلبوا على هذ “بزاف” بخِدمة الثقافه والإبداع ، وحتى نقدروا نزيدوا نعطيوا للزجل علاش قدينا واحنا قاصدين قصيدتنا المستقبليَّه ولو أنها بعيدَة المنال.
ادريس أمغار مسناوي
تيفلت : أبريل / مايو 2021 م
