بداريجة : الشعار الجديد ديال وداد صفرو وصحاب هذا ماوجدنا عليه آبائنا !

كولشي متافق على أن فريق الوداد الرياضي الصفريوي فريق عريق تأسس من 1971 ، عمرو دبا 53 سنة ولكن نتافقو على أنه طيلة هذ السنوات مكان عندو طموح كبير باش ينتقل من الهوات قسم ثاني الى القسم الأول ، كما هاذي سنتين تحت الرئيس ديالو الجديد يوسف منظور لي جاب ديناميكية كبيرة ورجع الجمهور للتربين وخسر لملاين الصحاح غيرة على مدينتو باش يحقق الحلم د الفريق د مدينتو يشوفو كيلعب فالقسم الثاني، وحتى حاجة ممستحيلة فاش كتجمع النية والخدمة ، الراجل دغيا مول الفريق ومأسس الادارة ديالو وجاب لوجستيك وحافلة خاصة بلعايبية ، وزادها بانتدابات كيحلموا بها فرق فمدن اخرى عندهوم منح مضخمة ومستشهرين ، وتحول الفريق من فريق ديفيسيت كيدعي بلعما ولعايبية مقاجين مع المسؤولين فالفترة السابقة من بعد كل ماتش باش يخلصهوم حدا لقهاوي ، وتحول من فريق كيشكر لي عطاه ستة ديال لكواري فليام لكحلة ، تحول لفريق قاد ، قد فمو قد دراعو فريق ناضج ببصمة جديدة ومكتب جديد وبمدرب جديد ومغمور بحال الدينامو الأشهبي لي عندو ديبلوم A وكتحلم بيه أي فرقة فالقسم الثاني وكيشهدوا بيه المتنافسين قبل من الصحاب بأنه ثعلب فالميدان وكيعرف يلعب على نقط الخصم ويلون التكتيكات الهجومية والدفاعية فكل لحظة ، فريق بإنتدابات معتبرة ولعايبية ولاو كيخلعو أي فرقة كتلعب فالقسم الثاني هوات و فيهوم ولاد لبلان بحال المهدي قرواش قلب الهجوم الواعد وفيهوم مساعد مدرب ولد لبلاد ولاعب سابق فالوداد لحبيب اطار عندو تجربة وكيعرف يخلق الروح والانسجام فلعايبية .
فرقة جديدة بحال هاذي ردمات الشباك ديال شباب مريرت ب سبعة د الأهداف مقابل واحد مؤخرا وحرز على انتصار اخر على شباب عالم طنحة فبلادهوم بواحد لصفر مؤخرا بالهدف الجميل لي سجلو بلال بورجو، خصنا نصفقوا ليها وندعيو ليها بالربح ماشي نشوشو عليها على اتفه الأسباب !
وخا نكونوا غ شزيا متفقين عطيني عقلك ، غنكونوا متافقين بلي اي واحد يقارن وداد صفرو من لبارح لليوم غيلقا راسو أمام وداد جديدة بنفس جديد وبصمة شكل آخر ، اصبح فالرتبة التالتة بثمان نقط بانتصارين وجوج تعادلات وسجل 12 هدف فالبطولة مند بدايتها وسبعة فكاس العرش اه فريق جديد وبطموح كبير شي ناس هاد ليامات لي كيفكرونا بصحاب (هادا ماوجدنا عليه آبائنا) و إنا عكسنا ، شادين فالرمز الجديد ديال الفرقة لي أشر عليه المكتب الجديد , ونساو كل هاد المجهودات لي ميمكنش ميشوفهاش إلا من في قلبه( شيئ من حتى) وشادين فلواه بدلو شعار الوداد الرياضي الصفريوي مع ان كل الفرق لها الحق في تغيير الرموز وهي مجرد هوية بصرية للفريق وماشي كتاب منزل استغفر الله العظيم ، ومسولوش راسهوم علاش الفرقة لي فعمرها 53 سنة بقات فبلاصتها فنفس القسم كتضوبل وتاعاود حتى شابت جيل كلو ومزال مطلعاتش .
هاد المدة كاملا ومعمرها مادارت قفزة كبيرة كما دارتها فظرف وجيز ولات كتحفز باش تدوز لبروميي ديفيزيون ماشي حلم ولكن تحقيق استراتيجي ، مع الرئيس الجديد يوسف منظور لي ولا مجهودو وطموحوا شوكة فحلق بعض المتفيهقين وبياعين الكلام ، وكيوظفوا لي داير رجل على رجل باش يدير من الحبة قبة لواه الشعار ثرات ومحفظ ولاواه فيه ريحت الخضر ومول المجمر وبزاف د الخزعبلات وراه شعار الفريق غير هوية بصرية يالفهايمية ولمازالين كيبكيو على الأطلال ،المهم والأهم اكتر هوما النتائج لي كتحمر لوجه لي ولى كيحصل عليها الفريق أما الخضر ولا زرق راه غ ألوان ومنقدروش نقولو كتر ما قال واحد الشاب من جمهور وداد صفرو بلي هذا صراع أجيال ، جيل للأسف موصلش هادي 53 سنة وخا بانو فيه لعايبية معمرهوم يتنساو بحال با الهادي وعامر وزيد وزيد ، وخصو غ كفاش يبرر الفشل ويعرقل الإرادة الجديدة ، وجيل شاب باغي يوصل فأقل مدة زمنية للصعود لبرومي ديفيزيون ، برئيس جديد واستراتيجية جديدة وبصمة ورمز جديد مع الاحتفاظ برمزية حب الملوك رمز مدينتنا لعزيزة نبدلو العتبة ياكما يكون فال خير وبراكا مديرو من لحبة قبة يرحمكم الله !